TACLOBAN CITY – Utro nga nagpahinumdom an Department of Trade and Industry (DTI) nga ginbabawal basar ha ira mandato an “PM is the Key” o pagsend hin prive message ha seller para masabtan an presyo han mga produkto nga ginbabaligya online.
Sumala kan Eleanor Etulle, Chief Consumer Protection Division DTI Regional Office 8, an PM is the Key nga ginbubuhat han mga online sellers in usa nga pagtalapas han Republic Act No. 7394 Consumer Act ngan Price Tag Law.
Base ha mao nga balaud o mandato kinahanglan nga dire la ha mga physical stores ginpapakita an mga presyo han produkto kundi pati na gihapon ha mga ginbabaligya ha online.
An mao nga balaud in nagpapanuyo nga protektahan an katungod han mga konsumidor sanglit nanawagan gihapon an DTI nga igreport ha ira buhatan kun mayda makikit-an nga online sellers nga nagpopost hin PM is the Key para ha ira mga ginbabaligya nga produkto.
Ginklaro gihapon han mao nga opisyal nga mayda kaangayan nga penalidad ngan kaprisuhan an hino man nga mapapamatud-an nga nakatalapas han mao nga balaud.
