TACLOBAN CITY – Nagpagawas hin Suggested Retail Price (SRP) iton buhatan han Department of Trade and Industry (DTI) para ha mga school supplies mahitungod nga natikaharani na manggud iton pag abri han klase hiton School Year 2023-2024.
Sumala kan Aivi Borbon-Ancheta, Information Officer lll hiton Department of Trade and Industry (DTI) Regional Office 8, an nasabi nga bag-o nga Suggested Retail Price (SRP) in ginpagawas dida pa han Hulyo 25 kun diin an titulo hine in amu an “Gabay sa Pamimili ng School Supplies”.
Mabibilngan naman an nasabi nga SRP list ha online kun igsesearch ine.
Kaupod ha nasabi nga SRP list an mga mga presyo han notebooks, lapis, ballpen, ngan iba pa nga gagamiton han mga istudyante para hiton tiarabaot nga pag abri han klase. Dire naman bulig ha ginpagawas nga SRP an pamresyuhan han mga bags, sapatos, ngan uniforms nga gagamiton han mga istudyante mahitungod nga dire na ine sakop hiton DTI.
Maabot naman ha P1.50 ngada ha P4 an deperensya han presyo han SRP nga ginpagawas dida pa han nakalabay nga tuig han Agosto 12 pero mayda daw gihapon mga papliton nga nagpabilin la ha daan nga presyo hine.
Ha mga notebooks naman, naabot an P3 ngada ha P4.50 an nagin price increase hine, samtang ha lapis naman in ada P1.50 ngada ha P2 an ginhitaas han presyo hine.
An paghitaas naman daw han presyo han mga school supplies in mahitungod han paghitaas gihapon han presyo han mga raw materials nga gingagamit paghimo hine.
