NATIONAL – Magpapatuman an Department of Trade and Industry (DTI) hin mga proactive measures nga pitad agud mabaton an mga posible nga epekto han igin suhestyon nga universal tarrifs ni US President Donald Trump, nga posible magdurot hin hulga ha export sector han nasud.
Ha usa nga pahayag, gintagan-duon ni DTI Secretary Cristina Roque nga an US in usa ha mga pangunahon nga partner trading han Pilipinas kun diin posible nga makaapekto an taripa ha magkaduru-dilain nga produkto nga gin eexport han Pilipinas.
Agud mabaton, ginmalatumat han DTI nga makikigbinuligay hira hin personal ha administrasyon ni Trump agud paghuna-hunaan an mga solusyon nga magigin “mutually beneficial.”
Usa ha mga plano nga iginkokonsidera han DTI in an posibilidad han mga preferential trade agreements, nga subay ha ahensya, in makakatagamtan an parehas nga ekonomiya han Pilipinas ngan Estados Unidos.
Subay manggud ha datos han Philippine Statistics Authority (PSA), dida han 2024 nagpabilin an Pilipinas kumo nangunguna nga nasud nga nage-export hin mga produkto ha Estados Unidos.
Kun diin maabot na ine ha $12.12 billion, kaupod ha mga pangunahon nga produkto han Pilipinas nga gin e-export ha US in an semiconductor devices, automobile parts, electric machinery, textiles and garments, ngan processed food and beverages.
Manunumduman nga ginpahayag ni Trump an pagpapatuman hine han 10% nga taripa ha ngatanan han produkto nga gin angkat tikang ha iba nga nasud tikadng ha US.
