TACLOBAN CITY — Ginsigurado han Department of Public Works and Highways o (DPWH) nga mahuhuman an retrofitting works han San Juanico Bridge ugsa mahuman an Disyembre han presente nga tuig, samtang padayon an mga preparations bisan waray pa iginpagawas nga pondo.
Sumala kan DPWH Eastern Visayas Regional Director Edgar Tabacon nga kumpiyansa hiya nga harani na igpagawas an P520 milyones nga pondo para han pag-ayad tulay, subay na gihapon ha mando ni Presidente Ferdinand R. Marcos Jr.
Gintagan gudman hin direktiba ni Marcos an ahensya nga dagmiton an retrofitting agud maakos han tulay an mabug-at nga mga sarakyan — tikang ha presente nga load limit nga 3 metric tons ngadto naman ha 12-15 ka-tonelada ugsa mahuman an tuig.
Dugang pa hini, samtang ginhuhulat pa an pondo tikang ha Disaster Risk Reduction Management in may-ada na ginbubuhat nga mga preparasyon an ahensiya agud pag-abot han pondo in deretso na an trabaho ha retrofitting.
Ha nakalabay nga semana in nagtikang na an DPWH ha pagdadara hin mga frame tikang ha Central Visayas para gamiton ha portal shoring han tulay.
An portal shoring in amo an paggamit hin dagko ngan mabug-at nga modular support system para masiguro an karig-on han tulay samtang gin-aayad.
Mahugot naman nga pagpaplano ngan koordinasyon an ginbubuhat han DPWH ngan iba pa nga mga ahensiya agud masigurado an katalwasan ngan kadig-on han operasyon.
(via Bombo Shiela Encio)
