TACLOBAN CITY – Ginpasabot han Department of Public Works and Highways (DPWH) Region 8 nga maabot ha P70-M an igin alutaga nga pondo han national government ha ilarom han 2024 regular appropriations para han pagbubuhat hin feasibility study para han ginpapagplanuhan nga igtukod nga International Convention Center (ICC) ha Syudad han Tacloban.
Ha phone interview han Philippine News Agency (PNA) kan DPWH regional information officer Cressida Paula Mangaporo, nga ha pagkayana in nag eevaluate na hira para han mga qualified bidders para han pagdudumara han pag iistudyo.
Dugang pa ni Mangaporo nga an desinyo hini in resilient nga mayda naman aerodynamic forms nga magtutugot para han normal nga pag agi han hangin nga nakalinya liwat ha klima nga mayda an rehiyon.
“If realized, this International Convention Center will be a world-class venue to host regional, national, and international events, representing an opportunity-rich and future-proof Tacloban City,” yakan ni Mangaporo.
An mao nga ICC in pagtitindugon ha 6.1 hectare complex han abandoned Leyte Park Resort Hotel nga kun diin, an panag-iyahan naman ini in ha Tourism Infrastructure and Enterprise Zone Authority, the Privatization Management Office, ngan an provincial government of Leyte.
Magpapagawas gihapon hin iba pa nga detalye an DPWH may paghisumpay han magigin timetable han feasibility study nga magdedetermina naman han pondo nga panginginahanglanon para han pagtindog han mao nga proyekto.
