Igin mando ni Department of Transportation (DOTr) Acting Secretary Giovanni Lopez ha Land Transportation Franchising and Regulatory Board (LTFRB) nga sirotan an mga bus company nga dire nagsusunod ha sakto nga terminal ngan road safety standards.
Ine in mahuman niya nga inspeksyunon an walo nga bus terminal ha Cubao kumo pangandaman ha Undas. Nahibaruan hine nga upat ha mga terminal an mayda mga pasilidad o sasakyan nga dire nasusubay ha mga standards han ahensya.
Nahibaruan gihapon ni Lopez nga kinahanglan mayda sakto nga lingkuran, bentilasyon, malimpyo nga kasilyas kaupod an all-gender restrooms, ngan sakto nga lugar para ha mga drivers ngan mga magbabalyo hin diaper o magpapasuso.
Napansin gihapon hine nga mayda worn-out tires an usa nga bus han Jam Liner, waray akto nga pasilidad an Dagupan Bus Co., mayda expired permit an DLTB Bus Co., ngan kulang an sakto nga lingkuran an Super Lines Bus Co.
Gindayaw naman hine an Victory Liner, Viron Transit, ngan Alps Bus Co. mahitungod ha mahusay nira nga terminal, labi na an Victory Liner nga mayda hagdan nga bulig para ha mga senior citizens ngan PWDs.
