NATIONAL – Nanindugan an Department of Justice (DOJ) nga gintutudlok la gihapon nga kidnapping an kaso han mga nawawara nga mga parag-bulang.
Ini in ha kaluyo han mga ginbuyagyag ni alyas “Totoy” nga ginpatay ngan iginlabog ha Taal Lake an mga biktima.
Sumala kan Justice Undersecretary Raul Vasquez, kutob diri pa nabibilngan an mga biktima o an ira mga lawas, padayon ini nga gintutudlok nga kaso hin kidnapping.
Dugang pa ni Vasquez, bisan naghatag na hin mga testimonya hi alyas “Totoy,” waray la gihapon mabilngan nga ebidensya nga magpapamatu-od nga patay na an mga sabungero hinugdan nga diri masisiring nga kaso hin panmatay o homicide.
Ha kaluyo hini, harani na makahimo an DOJ hin usa nga airtight case kasunod han mga sagunsun nga imbestigasyon.
Iginpatapud naman han opisyal nga ginkokonsiderar han ahensya an tanan nga nagawas nga impormasyon tikang pa han bumuto an nasabi nga isyu, pira na ka-tuig na an naglabay.
