Gin kondena ni Defense Secretary Gilberto Teodoro Jr. an China Daily mahuman hini magpagawas hin usa nga social media post nga naghuhulagway ha mga Pilipino kumo mga unggoy kasumpay han istoryahon ha arbitral ruling ha West Philippine Sea (WPS).
Sumala kan Teodro, an nasabi nga post han Chinese state media outlet in nagpapakita han panlantaw han Chinese Communist Party (CCP) ha mga Pilipino.
Ginpagawas an kontrobersyal nga post han China Daily dida han Hulyo 10, duha kaadlaw ugsa an ika-10 nga anibersaryo han makasaysayanon nga desisyon han Permanent Court of Arbitration nga nakilala ha katungod han Pilipinas ha Exclusive Economic Zone (EEZ) hini ha WPS.
Ha ginpagawas nga pahayag dida han Hwebes han gab-i, ginmalatumat ni Teodro nga an pagpapakita ha mga Pilipino kumo unggoy in usa nga klase hin pag-menos ngan propaganda kontra ha nasud.
Makikit-an manggud ha nasabi nga nasud an usa nga unggoy nga nakasul-ot hin Barong Tagalog ngan salakot samtang baga-baga hin ginmamanduha han mga karakter nga nananaglawas ha mga Amerikano ngan Hapones.
Iginpakita gihapon ha video an ungoy nga ginbobomba hin water cannon ha kadagatan mahuman makakarawat hin kopya han arbitral award.
Sumala kan Teodoro, an nasabi nga materyal in panginsulto ha 2016 Arbitral Award ngan usa nga pagpapakita han karasahan kontra ha mga Pilipino ngan sundalo.
Gintawag gihapon han sekretarya nga “contemptible propaganda” an nasabi nga post ngan igindupn nga nagpapakita ini hin kawaraya kapas han China nga depensahan an ira mga pahayag ha WPS pinaagi han tadong nga argumento.
Samtang, nagpagawas gihapon hin pahayag ni Rear Admiral Jay Tarriela, tagapagyaka han Philippine Coast Guard para ha West Philippine Sea concerns, kun diin ginkondena hini an anuman nga klase hin racism.
“Racism has no place in this day and age — and racism meant to belittle another race deserves nothing but condemnation. Filipinos are not monkeys!” pahayag ni Tarriela ha social media.
