TACLOBAN CITY – Gin-aaghat han Department of Interior and Local Government (DILG) Regional Office 8 an mga taga-Sinirangan Bisayas nga aktibo nga magpartisipar ha pangobyernuhan ha nasod ngan magin kaparte ha pagbabag-o.
Sumala kan Myles Colasito, tagapagyakan han DILG Eastern Visayas, an pagdudumaraon nga duha kaadlaw nga Regional Conference for Peace and Development (RCPD) ha maabot nga Mayo 24-25 ha Catbalogan City,Samar in usa nga higayon agud nga maipagawas han iba-iba nga sektor an ira mga ungara ngan matagan hin kaangayan nga solusyon han gobyerno.
An mao nga katitirok in tatambungan han mga tinaglawas han labor sector, peasant, grupo hin mga kababayin-an, indigenous people, mga parag uma ngan purupangisda ngan sugadman han youth sector.
Titirukon naman an mga issues ngan concerns han mao nga mga sektor kun diin ig-uupod ini ha social reform agenda han presidente ha nakatalaan hini nga State of the Nation Address (SONA) nga amo liwat an mag-gigiya ha kongreso ha ira magigin legislative agenda.
Dugang pa ni Colasito nga an pagdudumaraon nga massive consultation ha iba iba nga sector in makakabulig gihapon agud magkamayda hin mas maupay nga pangobyernuhan kon diin magkakaada hin oportunidad an publiko nga makiparte ha pagplano, pag-implementar ngan monitoring han mga proyekto han gobyerno.
Amo ini an gintatatwag nga participatory governance.
Kon mababaruan dida ha pagtikang han administration ni Presidente Duterte han 2016, nagbug os ini hin Cabinet Cluster of Participatory Governance, nga maghahatag hin higayon ha mga ordinaryo nga Pilipino nga magcontribute ha governance system.
Han 2017, nagmugna hi Duterte hin bag o nga Cabinet clusters on infrastructure and participatory governance pinaagi han Executive Order 24, agud mahisabtan an magigin prioriyidad han administrasyon.
Pinaagi liwat han serye hin konsultasyon ha mga community leaders ngan members han basic sectors na-organisa an Regional Conference for Peace and Development nga maghihimo han regional peace and development agenda.
An mga proposal nga maisusumite ha duha kaadlaw nga aktibidad nga aatendiran han mga representante han iba iba nga sektor in gagamiton nga basehan or reference ha paghimo han final output nga tatawagon nga Social Reform Agenda of the Basic Sectors.
