Ginkumpirma han Department of Foreign Affairs (DFA) nga magpapasaka ine hin diplomatic protest kontra ha China mahuman an panibag-o nga panha-harass han China Coast Guard ha mga barko han Pilipinas ha kadagatan nga sakop han Pag-asa Island.
Subay ha DFA, igsasalawad an protesta kasunod han report nga pira nga China Coast Guard ngan Chinese Maritime Militia vessels an nagdumara hin delikado ngan mapan-ayat nga pag-maniobra kontra ha tulo nga barko han Pilipinas kakulop han aga, Oktubre 12.
Subay ha report ni Philippine Coast Guard (PCG) Spokesperson Commodore Jay Tarriela, ginamitan han CCG vessel 21559 hin water cannon an BRP Datu Pagbuaya han Bureau of Fisheries and Aquatic Resources (BFAR) ngan gintuyo nga bungguon ine.
Naguba naman hin gutiay an barko pero waray naman may nasamaran ha mga sakay hine.
Subay ha PCG, an mga barko han Pilipinas in nakaduong ha teritoryal nga kadagatan han Pag-asa Island agud maghatag-proteksyon ha mga paru-pangisda nga Pilipino ha ilarom han programa nga “Kadiwa para sa Bagong Bayaning Mangingisda (KBBM)”.
