TACLOBAN CITY – Positibo an mga residente han San Joaquin Palompon Leyte ha padayon nga pag-gius han kaso nga ira ginsalawad ha DBSN Farms Agriventures Inc. mahitungod ha daw pagtalapas ha balaud pan-kalibungan.
Una hini, nagdumara hin press conference hi Atty. Lloyd Surigao, abogado o legal counsel han mga residente han San Joaquin Palompon, para igpahamtang an development han kaso nga ginsalawad han mga ini.
An mao nga isyu in nagtikang ha reklamo han mga residente ala kontra ha operasyon han DBSN poultry farm, kun diin gin aalegar nga may ginpanlabog ngan ginpanlubong nga mga basura ha pira nga parte han Palompon Portected Watershed, nga gin-ookuparan han mao nga poulty farm.
Sumala kan Atty. Surigao, usa nga dako nga kadaugan ngan development han kaso an desisyon han Regional Trial Court Branch 45 nga tugutan an search and excavation, ha mao nga mga lugar ha Palompon Protected Watershed.
Dugang pa hini, nga tanan han tulo nga areas nga gin-excavate o ginbukad han DENR-8 in positibo ha mga basura.
Ini in pagpapamatuod daw nga damo nga hugaw nga nadadakaot ha kalibungan an ginlubong ha mao nga lugar. Butang nga gindidiwara naman han tag-iya han mao nga poultry farm.
Ginpahayag gihapon ni Atty. Surigao, halaba pa an dadalaganan han mao nga kaso ngan padayon an ira pakipagbisog bahin hini agud nga maproteheran an kalibungan ngan mao nga lugar.
