TACLOBAN CITY– Nagpagawas hin health advisory itun Department of Health DOH-8, may paghisumpay hiton padayon nga paghinitaas iton mga kaso hiton Dengue ha Sinirangan Bisayas.
Sumala kan Jelyn Lopez-Malibago, Information Officer hiton Department of Health o kun DOH Regional Office 8, nga posible nga rason an paghitaas han mga dengue cases ha rehiyon in mahitungod han pag inuran han nakalabay nga mga semana nga nakagdurot pa hin mga pagbaha.
Basar ha datos han buhatan panlawas, in nakaghipatik hira hin maabot ha 327 itun Dengue cases ha bug-os nga Rehiyon 8 as of January 28 nga kun diin, usa na an ira nahipatik nga naawat an kinabuhi tungod han mao nga sakit.
Umabot gihapon ha 54% nga huruhitaas iton mga kaso han Dengue han yana nga bulan hitun Enero han yana nga tuig, kumpara han una nga tuig 2022.
Nangunguna ha ira listahan itun Probinsya han Leyte, ginsundan hini han Northern Samar, Southern Leyte, Samar, Eastern Samar ngan Biliran.
Nakaghipatik gihapon hira hin 8 nga mga barangay nga mayda clustering hitun dengue cases nga kun diin, mayda ini tag 3 ngada ha 4 itun mga mayda dengue ha mga barangay.
Kun mahihinumduman, in usa nga nakakag aghat hiton mga lamok in an mga tubig nga natitirok ha mga surudlan nga diri nahuhuwad nga didto liwat ginbubunayan han mga ini.
Una na gihapon nga ginduduso han buhatan nga padayon nga pag sundon an 4 oclock habit ngan an 4S nga Search and destroy mosquito breeding places, seek early consultation from health experts, Secure self-protection ngan Support fogging/spraying.
