NATIONAL NEWS- Sumaka na ha 12 an ihap han mga namatay matungod han Tropical Storm Basyang, subay ine ha pinaka-urhi nga report han Office of Civil Defense (OCD).
Subay ha OCD-siyam ha mga namatay nga naitala ha Northern Mindanao (Region X) kun diin 4 an namatay ha landslide ha Cagayan de Oro City, upat gihapon ha Lanao del Norte, samtang usa naman an presente nga bina-validate.
Naitala gihapon ha Caraga region an 3 nga namatay matungod hiton pagkalunod duha ha Surigao del Sur ngan usa ha Agusan del Norte.
Subay ha Philippine Atmospheric, Geophysical and Astronomical Services Administration (PAGASA), an bagyong Basyang in nag-landfall hin lima kabeses.
Kasumpay hine, nakaghipatik naman hin pinaka urhi nga situational report an National Disaster Risk Reduction and Management Council (NDRRMC), kun diin umabot ha 30 barangay ha rehiyon han Caraga an ginbaha ngan nakaapekto ha 64,360 pamilya o 232,550 indibidwal ha kabug-usan nga 517 barangay.
Ha nasabi nga ihap, 16,528 pamilya o 53,983 katawo an presente nga aadto ha 480 evacuation centers, samtang 4,489 pamilya o 16,807 indibidwal an ginbuligan han gobyerno ha gawas han mga evacuation facility.
Labot la ha OCE- 9532 nga pamilya o 31,981 indibidwal an iginpailarom ha preemptive evacuation ha magkalain-lain nga rehiyon.
Subay naman ha Department of Social Welfare and Development (DSWD) nakapandistribwer na hira hin sobra P27 million worth of humanitarian assistance ha mga pamilya nga apektado ha bug-os nga nasud.
