TACLOBAN CITY– Purluminos P10M an ginbayaan nga danyos han Tropical Depression Ada ha agrikultura partiklar na ha Northern Samar nga usa ha mga apektado han naglabay nga bagyo.
Sumala kan Department of Agriculture Regional Office VIII, OIC Regional Director, Rodel Macapañas, subay ha ira ginhimo nga assestment pagkahuman han bagyo, ada ha 800 hectars an apektado ha mga tanuman hiton humay, ngan an iba ha mga ine bag-o pala nga katatanom nga mga seedlings han magkalulumos ine ha tubig baha.
Dugang pa ni Macapañas, apektado gihapon an mga pananom ha Bobon, Las Navas, Catarman, Catubig ngan Mondragon Northern Samar.
Subay gihapon ha ira panginano, wara naman mga panimalay nga duro nga naapektaran han bagyo, matungod nga dire naman sugad kakusog an hangin nga dara ni Bagyong Ada, pero an waray hunong nga uuran an naka-apekto han mga pananom nga usa ha mga ginkukuhaan hiton pakabuhi han mga taga Northern Samar.
Nakapagtala gihapon hira hin report nga lumos ha tubig-baha an pira nga mga pananom ha Leyte, pero dire naman ine sugad ka grabi matungod nga humubas dayon an nasabi nga pagbabaha.
Ha pagkayana, padayon an ira ginhihimo nga pag-asister ha mga parag-uma han Northern Samar, para dayon ine nga makabakda tikang ha epekto ni Bagyong Ada.
