TACLOBAN CITY – Naugbaw hin kalayo an bug-os nga merkado publiko han Oras Eastern Samar ha Brgy. Tiguib kun diin apektado gihapon an pira nga panimalay harani ha mao nga lugar.
Sumala kan SFO1 Vitus Moscare, Chief han Oras Municipal Fire Marshal, nagtikang an mao nga sunog ha usa nga bakante nga stall ha mao nga merkado kun diin may nag-iirignom nga mga tambay.
May nakit-an daw nga live wire nga nagspark ha mao nga stall ngan ginbuhusan ini hin tubig han mga nag-iirignom nga naging rason han mao nga sunog.
Madagmit an naging pagsarang han kalayo ha bug-os nga merkado ngan naapektaran gihapon hini an pira nga mga kabablyan nga harani hini.
Posible gihapon daw nga diri la ha mao nga stall nagtikang an sunog ngan posible nga may iba pa nga live wire nga nagspark mahitungod nga tigda an pagdako han kalayo.
Ginbabana bana nga maabot ha P45 million an naidurot nga danyo han mao nga insidente.
Waray naman may nahipatik nga casualty o samaran ha nahitabo nga sunog.
Ha pagkayana in padayon pa an gindudumara nga imbestigasyon han mga otoridad ngan natagan na gihapon hin pauna nga bulig an mga biktima.
Samtang, han nakalabay la gihapon nga semana in mayda gihapon insidente hin sunog nga nahipatik ha mga commercial establishments ha Guian Eastern Samar.
