TACLOBAN CITY — Ginpapahuru-hugot pa han Department of Agriculture Eastern Visayas an ira pangandaman para han maraot nga kondisyon han panahon nga naghuhulga ha produksyon han bugas ha rehiyon.
Nagpahimatngon an Department of Agriculture – Eastern Visayas ha dako nga epekto han susrunod nga makusog nga pag-uran ngan mga bagyo dida han katapusan nga parte han 2025, ngan syahan nga bulan han 2026 ha produksyon han humay ha rehiyon, partikular na ha Leyte.
Sumala kan DA-8 Agribusiness and Marketing Assistance Division Chief Francis Rosaroso, umubos an ani han humay ha Leyte ha katapusan nga parte han kat-garab dida han 2025, kun diin tikang ha 4.70 metriko tonelada kada ektarya in lumaprak ini ha 4.06 metriko tonelada kada ektarya.
Mahitungod ha mga danyos nga durot han maraot nga panahon, naapektuhan an iskedyul han pagtanom ngan pag-garab ha pira nga pangunahon nga rice-producing areas ha rehiyon.
Ha kaluyo hine, ginsigurado han DA nga mayda supresyente suplay han bugas ha Eastern Visayas pinaagi han utro nga pagpapadayon han pag-angkat han bugas. Mahugot gihapon nga ginbabantayan han ahensya an kadamo han gin aangkat agud dire maapektaran an farmgate price o presyo han humay ha umhanan.
Dugang pa ni Rosaroso, ginbabalhin na han gobyerno an estratehiya hine tikang ha dayon nga pagbaton tikadto ha pagpapakusog han karig-on han sektor han agrikultura. Kaupod ha mga prayoridad an pagpapatindog han cold storage facilities, mechanical dryers, silos, pag-upgrade han rice processing systems, greenhouse projects, ngan smart irrigation systems agud maibanan an epekto han mahugot nga pagbabag-o ha panahon.
Ha datos han ahensya, an sektor han panamon an pinakaapektado ha bug-os nga nasud dida han 2025. Ha ikaupat nga kwarter, umubos ha 2.5% an kantidad han produksyon han mga pananom, kaupod an humay ngan mais, nga umabot ha ₱274.3 bilyon.
Sugadman, ha kabug-usan nga tuig, nakaghipatik la gihapon hin 2.8% nga paghitaas an crop production nga umabot ha ₱986.8 bilyon—kaparehas han 56% han kabug-usan nga produksyon han agrikultura ha nasud.
Basar hiton datos, ginpapakita hine nga an mga pananom an nagpapabilin nga pundasyon han agrikultura, sugadman nagigin kaluyahan gihapon ine kun maraot an panahon, sumala hiton Department of Agriculture.
