TACLOBAN CITY – Naghatag hin pagklaro an buhatan han Civil Service Commission (CSC) Region 8 ha mga Bar ngan Board Exam Passers kasumpay han pagkuha han Certificate of Eligibility.
Sumala kan Civil Service Commission Region 8 Legal Service Division Chief, Atty. Jane Balledo, an mga nakapasar na ha bar ngan board exam in automatic na nga qualified civil servants ngan Second Level of Eligibility holder kun diin pwede nira nga masudlan an bisan anu nga posisyon nga gobyerno basta naka-linya ine ha ira propesyon.
Dugang pa hine, an mga valid IDs o board ratings nga nakarawat han mga passers tikang ha komisyon nga ira gin parehistruhan kumo propesyunal, in amu na an ira kopya han ira eligibility ngan pagpamutuod han ira pagka-propesyunal.
Gin klaro gihapon han nasabi nga opisyal nga an ira la gintatagan hin Certificate of Eligibility in an mga nagpaka-pasar han exam han Career Service Examination-Professional Level, Career Service Examination- SubProfessionaI Level, Fire Officer Examination (FOE), Penology Officer Examination (POE), Basic Competency on Local Treasury Examination (BCLTE), ngan Career Service Examination for Foreign Service Officer (CSE-FSO).
Samtang, an valid professional license o Certificate of Registration naman nga gin isyu han Korte Suprema, Professional Regulations Commission, ngan MARINA, in magsi-serbi gihapon kumo eligibility han mga bar ngan board passers. Kikilal-on gihapon nga eligible an mga nagpaka-pasar han Shari’a Bar Examinations.
Gin pahibaro naman hine nga extended na an nasabi nga eligibility para ha Marine Deck and Engine Officers ngan lisensyado han Maritime Industry Authority (MARINA).
Ha lain nga bahin, nakatalaan naman nga pagdumaraon an masunod nga Civil Service Exam-Paper and Pencil Test ha Marso 2, 2025, kun diin titikangan an aplikasyon yana nga maabot nga Nobyemre 19, 2024 kutob naman Enero 3, 2025. (via Bombo Niña Magpili)
