TACLOBAN CITY– Waray na kinabuhi an usa nga construction worker mahuman ine nga mahulog ha usa nga bobon ha Brgy. Pangasugan Baybay City Leyte.
Ginkilala an biktima kan alyas Rey, 22- anyos residente han Brgy. Cabuynan Tanauan Leyte.
Sumala kan PLTCOL. Nerro Hobrero, Chief of Police, Baybay City Police, nga subay ha ira gindumara nga imbestigasyon, an biktima in usa nga laborer ha usa nga construction site ha VSU, ngan nag-alog ine hin tubig agud nga gamiton pagmasa hiton semento, ngan han tigda nala ine nga nawara.
Dugang pa ni Hobrero, subay ha salaysay han tiyo hiton biktima, han tipag-urodto na, in namiling na ine ha iya umangkon, agud nga kumaon hin paningudto, ngan humagos anay hin 1 ka-oras ugsa nga pamilngon an biktima.
Ngan han namimiling na an mga ine, didto nahikit-an an patay nga lawas han iya umangkon ha sulod han bobon.
Gintutuohan naman nga nahipalindas an biktima rason han iya kahulog ha bobon, nga nagin kawsa han iya dayon nga kamatayon.
Waray naman nakikit-an nga foul play an mga kapulisan ha nasabi nga panhitabo.
