TACLOBAN CITY – Padayun nga ginpipinalisa yana han City Licension Division han Lokal nga Pangubyernuhan han siyudad han Tacloban an pagbabalhinan nga lugar han mga ambulant vendors.
An mao nga pitad in kasumpay han ginpalusad nga memorandum circular han City Interior and Local Government bahin han paghawan han mga nakakaulang ha mga kakalsadahan.
Sumala kan Gemafiel Gaspay, Head han Business Permit and City Licensing Division, nga ugsa hira nga magdumara hin clearing operation ha mga kakalsadahan in nagtudlok anay hira hin mga babalhinan han mga ambulant vendors subay naliwat ha gindumara nga diyalogo.
Mababaruan nga gintudlok komo babalhinan han mga vendors an sulod han Shopping center.
Sumala kan Gaspay nga naiha na unta nga nabalhin an mga ini kun waray la ini nga ginaabat nga pandemya.Ha pagkayana in padayun an ira gindudumara nga inspeksyon ha mga kakalsadahan pati naliwat ha lugar nga babalhinan.
