TACLOBAN CITY – Gin aaghat han Tacloban City Agriculture Office an netizen nga nag-post ha social media kasumpay han gin aalegar ‘uluron’ nga isda nga napalit hine nga makigsumpayan ha ira.
Sumala kan Tacloban City Agriculture Office Head, Romelo Anade, mas maupay kun magkikig-istorya ha ira an nasabi nga netizen agud maaksyunan hin sakto an nasabi nga insidente.
Nagpatapod naman ine nga dire nira igpu-publiko an ngaran o impormasyon han nag-post agud dire liwat ine ig-bash han katawhan.
Ginmalatumat pa ni Anade nga dire nira masosolbar an problema kun dire ine magpapakilala ha ira mahitungod nga dire liwat nira matutudlok kun hin-o nga parag-isda an napalitan hine.
Samtang, ginsigurado pa hine nga nagdudumara an ira buhatan hin inspeksyon duha ka-beses ha usa kasemana partikular na ha isdaan nga parte han merkado agud masigurado nga nagsusunod an mga parag-isda ha mga patakaran.
