Naglunsar dida han Biyernes an Cybercrime Investigation and Coordinating Center (CICC) hin panibag-o nga kampanya kontra ha mga dire rehistrado nga online lending platforms, kasunod han paghitaas han ihap han mga Pilipino nga nabibiktima han ilegal nga pautangan ha intenet.
Tikang han Enero kutob Pebrero yana nga tuig, nakakarawat an CICC hin haroas 600 nga reklamo—mas hitaas kumpara ha kaparehas nga panahon dida han 2025.
Sugadman, natuod hi CICC Executive Director Renato “Aboy” Paraiso nga damo la gihapon nga kaso an waray mahireport.
Subay ha CICC, damo ha mga scam nga online lending scheme an nagamit hin online promotions nga direkta nga nagdadara ha website imbes nga lehitimo nga app, nga mayda automatic authorization o auto-collection features.
Ha sugadman nga pamaagi, nagkakamay-ada hin access an scammers ha contact list o social media accounts han biktima, nga ginagamit ha panhahadlok ngan panhaharass.
Dugang pa, kinahanglan gihapon nga maghirot an publiko ha mga pautang nga hamubo an interes pero mayda mga hidden charges.
Subay ha Securities and Exchange Commission (SEC), dire dapat lumahos ha 15 porsyento kada tuig an kabug-usan nga sukot, kaupod an interes ngan iba pa nga fees.
