NATIONAL NEWS– Nagpahimatngon an Commission on Human Rights (CHR) ha publiko kasumpay ha pan-upload hiton mga litrato han mga kabataan ha social media, kasunod han padayon nga paghitaas nga kaso han Online Sexual Abuse and Exploitation of Children (OSAEC) ha nasud.
Sumala kan CHR Focal Commissioner for Child Rights Atty. Beda Epres, akos na hiton teknolohiya ngan artificial intelligence nga manipulahon an mga littrato nga gin-upload ha internet.
Sanglit nga gin-aaghat hine an mga kag-anak nga likayan an pag-post online hiton mga litrato han ira mga anak.
An nasabi nga pahimatngon in kasunod han kaso han usa nga content creator nga hi Queen Hera, nga nadiskubrehan nga ginbabaligya online an videos gamit an litrato han iya anak.
Subay ha datos han UNICEF, triple an ginhitaas han OSAEC cases tikang ha 1.3 million han 2020 in sumaka ine ha 2.7 million han 2023.
Mababaruan nga kadam-an ha mga suspek in mga kaparyente o kag-anak han mga biktima.
