NATIONAL NEWS– Ginbabasol han China ha Pilipinas an insidente ha West Philippine Sea nga ginkadabihan han ira mga barko.
Manunumduman, nagbungu-ay an China Coast Guard vessel ngan han ira Navy samtang ginlalanat hine an gutiay nga barko han Philippine Coast Guard.
Natabo ine ha kadagatan nga sakop han Bajo de Masinloc nga sulod naman han aton exclusive economic zone.
Ha kaluyo nga hira an nagbungu-ay, ginbabasol han China an Pilipinas ngan ginpahayag nga an presensya han mga barko hiton Pilipino an rason han tensyon ha nasabi nga lugar.
Subay ha tagapagyakan han China Coast Guard, an ira mga pitad in “legal ngan ginkikinahanglan” agud nga paiwason an mga “illegal nga pagsulod han Pilipinas ha ira gintatawag nga Huangyan Island.
Dire la gihapon direkta nga gin-amin han China an banga-ay han ira mga bako, ngan ginkokondina pa hine an gios han Pilipinas.
Ha lain nga bahink, ginkondina gihapon han mga manbaralaod hiton Pilipinas an insidente ngan gintawag ine nga “reckless” ngan delikado, partikular na nga nagresulta ine hin pagkasamad han pira nga Chinese crew.
Subay ha Philippine Coast Guard, hira in gintarget hiton water cannon samtang nagdudumara hin regular nga patrol, pero nag-offer la gihapon hira hin bulig-medikal ha mga nasamaran nga Chinese personnel.
Ha pagkayana padayon an tensyon ha West Philippine Sea, samtang naninindugan an Pilipinas ha katungod hine alinsunod ha 2016 arbitral ruling.
