METRO MANILA – Kampante an Department of Energy (DOE) nga dire mangangadto ha fuel rationing o pagrarasyon han petrolyo an naabatan nga krisis ha lana ha bug-os nga kalibutan.
Ginmalatumat ni Energy Sec. Sharon Garin, ginbubuhat han gobyerno an tanan agud masigurado nga may insakto nga suplay han lana an nasud.
Ha kaluyo han limitasyon ha balaud ngan mandato nga ginhatag han Kongreso ha DOE, in mas ginpahugot nira an hoarding policy.
Dugang pa hini an mga guidelines nga ira gin-isyu ha mga oil companies.
Padayon naman an ahensiya nga nakikipagsumpayan ha Diplomatic Corps para ha posible nga bag-o nga suppliers han lana ha Pilipinas.
Samtang yana nga semana in maulpot ha nasud an 900,000 ka-bariles han petrolyo nga ginpalit han gobyerno ha Malaysia.
