TACLOBAN CITY – Andam na an mga personnel han Brgy. 95-A, Caibaan, Tacloban City para han pansaka han mga mag-aampo ha Mt. Carmel.
Dida pa la han mga nakalabay nga adlaw in mayda na mga nagpaka-standby nga kapulisan agud siguraduhon an seguridad han publiko
Sumala kan Caibaan Tacloban City Brgy. Chairman Earl Mejica, nga mayda na nira nagpaka-deploy nga personnel han ira barangay para mag-assist ha publiko.
Nagpahinumdum naman an kapitan nga kun masaka ha Mt. Carmel, in magdara hin tubig ngan payong labi na yana nga mapaso iton panahon.
Dugang pa hini nga likayan an pag-sigarliyo ngan pagdagkot hini ha bukid-arampuan mahitungod nga posible ini makag-durot hin sunog. Madagmit mangud maglarab an ligid han bukid mahitungod han kapaso han panahon.
Sumala pa hini nga ini an panahon han pag-ampo ngan pagbasol han sala, ngan kinahanglan nga respetuhon an lugar kumo usa nga sagrado nga arampuan.
Samtang, ginlalauman yana nga adlaw, Huybes Santo, an damo nga mga mag-aampo an masaka kutob Biyernes Santo kun diin, nagpakabantay naman an mga kapulisan ha mao nga bukid kutob Sabado.
