TEHRAN, IRAN – Natudlok an build-up o pagdamo han mga barko nga pangyera ngan fighter jets han Amerika harani ha Iran.
Ini in ha butnga han pag-pressure han US ha Islamic country kasumpay ha military program hini ngan deadly crackdown ha mga protester dida han nakalabay.
Kaupod ha nakit-an haran ha Iran an US aircraft carrier nga USS Abraham Lincoln, nga nangunguna ha usa nga strike group nga may tulo nga guided missle destroyers ngan 90 aircraft kaupod an fighter jets, in nahipatik nga gindeploy ha Gulf region dida han urhi nga parte han Enero pero waray pa ini kakit-i ha sattelite imagery kutob ha pagkayana. Bisan man natudlok an lokasyon hini ha may kadagatan han Oman, nga ginbabana-bana nga 700 kilometers an distansiya tikang ha Iran.
Nahipatik gihapon han US nga ginpadara hini an USS Gerald R Ford, an pinakadako nga barko nga pangyera han bug-os nga kalibutan, pakadto ha Middle East, nga ginlalauman maulpot ha nasabi nga rehiyon ha masunod nga tulo ka-semana.
Dida han Martes, nakatalaan magkita an mga opisyal han Amerika ngan Iran ha Switzerland para ha ikaduha nga paghisgot agud maundang an tensiyon ha butnga han duha nga nasud.
Sumala ha Iran an magigin pokus han duha nga pagharampang in ha nuclear programme hini ngan an posible pag-lakat han economic sanctions nga ginpasaka han US.
