NEW YORK, USA – Dire la suntok an lumupad ha boxing ring ha Madison Square Garden kundi pati na gihapon an wig han heavyweight contender nga hi Jarell “Big Baby” Miller.
Ha butnga han mapaso nga rapuhay kontra kan Kingsley Ibeh, nakatilaw hin sunod-sunod nga suntok an ulo ni Miller rason agud matanggal ngan lumupad an iya wig.
Imbes nga maawod, gintaw-an la ini han 37-anyos nga boksingero. Ginpurot niya an wig ngan gin-itsa ha audience ngan bumalik ha match.
Eksplikar ni Miller ha post-fight interview, aksidente niya nga nagamit an shampoo nga may ammonium bleach ha balay han iya nanay duha na ka-adlaw ugsa an boxing match.
Naragas an tunay hini nga buhok sanglit napiritan hiya nga magsul-ot hin wig.
Ha kaurhiaan, nagdaog la gihapon hi Miller via split decision. An iya wig naman in nagin instant celebrity kun diin ginpasa-pasahan ini han audience ngan nakit-an pa nga kapot han iba nga boksignero sugad kanda Fabio Wardley ngan Skye Nicolson para ha souvenir photos.
