Utro nga ginpamatud-an han TV host ngan aktor nga hi Billy Crawford an iya kakarit ha international stage mahuman kilal-on nga kampeonato ha Season 9 han Mask Singer France dida han Dominggo, Hunyo 28.
Ha Instagram post han Mask Singer, iginpaangbit hini an pagkanta ni Billy han “Beat It,” nga orihinal nga ginkanta han ginkilala nga “King of Pop” nga hi Michael Jackson, an nagin iya winning performance ha grand finale.
Ginkabiliban gihapon hi Billy han French audience ha iya mga performance han magkadiru-dilain nga French ngan English songs ha bug-os nga season, kaupod an Portrait,” “I Feel Good,” ngan “Uptown Funk.”
Ha usa nga tribute message nga iya ginpaangbit, ginpasalamatan ni Billy an bug-os nga Mask Singer production team ha pagpapabilin nga sekreto han iya pangilal-an ha sulod han usa kabulan ugsa igpahibaro nga hiya an aada ha luyo han karakter nga “L’Ane” o donkey.
Iginpaangbit gihapon niya nga espesyal an karakter nga “L’Ane” mahitungod nga ginpili ini niya para ha iya anak nga hi Amari.
Manunumduman nga hi Billy an nagin host han Masked Singer Pilipinas dida han 2020 ngan utro nga bumalik ha programa dida han 2025.
Dire naman ini an syahan nga dako nga kadaugan ni Billy ha France. Dida han 2022, nadukdok gihapon niya an kampeonato ha French edition han Dancing with the Stars.
Nakabulig gihapon ha iya kasikatan ha nasud kasunod han iya kalangpusan ha hit single song hini nga “Trackin” dida han 2002, nga naghatag ha iya fan base ha France.
