TACLOBAN CITY— Nakapaghipatik hin mas hitaas nga kaso hin sunog an Bureau of Fire Protection (BFP) Region 8 ha Tacloban City ha syahan nga tulo ka bulan yana nga tuig kumpara han nakalabay nga tuig-2024 ha kaparehas nga panahon.
Ha gindumara nga press conference, ginmalatumat ni Bureau of Fire Protection-Tacloban City Acting City Marshal FCInsp. Anthony De Paz, nga mayda lima (5) nga kaso hin sunog nga nai-rekord tikang Enero kutob Marso yana nga tuig-2025, kontra ha tulo (3) nga kaso nga naitala han Pebrero 2024.
Samtang nagpapadayon an imbestigasyon ha iba pa nga insidente hin sunog, ginmalatumat ni De Paz nga an kaurugan nga hinungdan han sunog in amo an electrical issues o an “electrical ignition caused by arcing.”
Nagpahinumdom naman hi Bureau of Fire Protection Regional Office 8 Fire Safety and Enforcement Division Chief, FSInp. Darwin D. Orsolino, ha publiko nga magin responsable ha paggamit han mga kagamitan nga de-kuryente.
“Kapag hindi na umiikot o gumagana ang electric fan o anumang appliances, ig-unplug na agad dahil maaaring magdulot ito ng overheating. Iwasan din ang paggamit ng substandard na outlets o appliances, please consult those licensed electrical practitioners that will allow your electrical systems nga maging maupay iton pag-conduct…”
“Siguro magin responsable nala kita. Let’s be responsible because safety starts with us…” an pamahayag ni Orsolino
Nagpahinumdom gihapon hi Orsolino han mga safety tips agud malikayan an sunog:
- *Tutdui an pamilya kon paonan-o parungon an circuit breaker han balay.
- *Likayan an paggamit hin “octopus wiring” o durugkot nga extension cords.
- *Ig-check an electrical wiring ngan an kabug-osan nga estraktura han balay.
- *Ayaw pagbilin hin nakasalang nga kalan o ginluluto nga pagkaon nga waray nagbabantay.
Gin-aghat naman han BFP-8 an publiko, nga padayon nga magbantay ngan sumunod ha fire safety measures agud malikayan an sunog ngan ma-proteheran an tagsa-tagsa nga panimalay.
