TACLOBAN CITY – Naghatag hin abiso an Bureau of Fisheries and Aquatic Resources BFAR-8, kabahin han pagpositibo han red tide han pipira nga mga kabaybayonan ha rehiyon.
Sumala kan Christine Gresola, Information Officer han Bureau of Fisheries and Aquatic Resources (BFAR) Regional Office 8, nagpalusad an ira buhatan hin panibag-o nga shellfish bulletin agud maipasabot ha publiko an mga baybayon nga dire pwede pagkuhaan han mga shellfish.
Nagpapabilin nga postibo han red tide an Irong-Irong Bay ha Catbalogan City, ngan San Pedro Bay ha Basey, Samar. Gindidire naman an pagkaon hin bisan anu nga klase han shellfish nga nagtitikang ha mga nasabi nga baybayon.
Samtang, ada naman ha ilarom han local red tide advisory an coastal water han Leyte, Leyte, Cancabato Bay, ngan an Guiuan, Eastern Samar.
Mag-aatubang naman hin penalidad an bisan hinu nga mahibabaruan nga magbabaligya hin mga shellfish nga tikang ha nasabi nga mga lugar.
