ODDNEWS– Nakaghimo an mga siyentista tikang ha usa nga unibersidad ha Belgium hin usa nga aparato nga naghihimo hin irimnon nga tubig nga tikang ha ihi.
Napamatud-an nira nga nagana an ira imbensyon han isalang nira ini hin napulo ka adlaw ha usa nga music festival kun diin damo an katawhan.
Mahuman an napulo ka adlaw in nahimo nira nga makagtirok hin 1,000 ka litro nga malimpyo nga irimnon nga tubig nga tikang ha mga ihi han katawhan nga umatender ha mao nga music festival.
Mababaruan nga nagana an aparato pinaagi han paglain han tubig tikang ha mga ammonia ngan iba pa nga mga nutrients nga dara han ihi.
Nagin posible naman ini pinaagi han pino nga pansara nga aada ha sakob han aparato ngan han solar power o kapaso nga tikang ha adlaw.
Hapagkayana in target han mga siyentista an makaghimo hin mas dako nga bersyon han ira aparato nga puwedeng gamiton ha mga pampubliko nga lugar sugad han mga airport.
Hingyap gihapon nga makabulig han ira imbensyon ha mga kablas nga nasod nga may problema ha pagkakamayda hin malimpyo nga irimnon nga tubig.
