BAYBAY CITY — Mahugot na an ginbubuhat nga pangandaman han syudad han Baybay para ha 2026 Eastern Visayas Regional Athletics Association (EVRAA) Meet nga nakatalaan pagdumaraon yana nga Marso 1 kutob 7, kun diin ginbabana-bana nga maabot ha 25,000 an kabug-usan nga ihap han mga atleta, opisyal, ngan bisita an maabot ha syudad.
Sumala kan Mayor Jose Carlos Cari, nakaandam na an Baybay City nga magdumara hin usa nga malinampuson ngan dire makakalimtam nga paisan-isan, pinaagi han bulig han mga makabag-o nga pasilidad ngan ginpahugot nga seguridad.
Sentro han pangandaman an New Binaybayon Sports Complex, kaparte han 10.5 ektarya nga Binaybayon Complex an gintalaan nga magin pangunahon nga sentro han paugnat-kusog ngan dagko nga katitirok ha syudad.
Nagsusulod ine hin Olympic-size rubberized track oval nga nakapalibot ha full-sized football field, duha ka parte nga grandstand nga himo tikang ha disenyo han Roman Colosseum ha Rome, Italy, ngan usa nga Olympic-size swimming pool para ha mga kompetisyon ngan paghag-id.
Sapit hini an Binaybayon Convention Center nga mayda kahaluag nga 7,589 square meter, nga magseserbi nga venue para ha opening ngan closing ceremonies ngan iba pa nga pangunahon nga aktibidad han paisan-isan.
Ginmalatumat naman ni Cari nga an mga bag-o nga pasilidad in dire la para ha EVRAA kundi para ha panmaihaan nga pagpapaursa han lokal nga sports program han syudad.
Dugang pa hine, ginlalauman gihapon nga makusog an turismo ngan ekonomiya han Baybay mahitungod ha pagdamo han mga bisita.
Nakikiusa gihapon an kumunidad ha pangandaman.
Igin aandam naman han mga pampubliko nga iskuylahan an mga classrooms kumo temporaryo nga urukyan han mga delegado, samtang ginhahag-id an mga volunteers para ha registrations, logistics, ngan crowd management.
Ginlalauman gihapon han mga lokal nga negosyante—kalakip an mga hotels, kaunan, ngan transport operators—an paghitaas han bookings ha sulod han usa kasemana nga paisan-isan.
Gin sigurado naman han Baybay City Police Office ha pagmamangulo ni Police Lt. Col. Dexter Edillo nga mahugot an ira igpapatuman nga seguridad.
Sumala pa haiya, magpapadara hin kadugangan nga pwersa an Leyte Provincial Police Office agud masigurado an katalwasan ha mga venue ngan billeting areas.
Samtang gindudumara an katapusan nga inspeksyon ngan pangandaman in mas nakusog naman an excitement han syudad para ha EVRAA Meet 2026—usa nga aktibidad nga ginlalauman magpaparayaw dire la han pakusugay kundi han paghambog han rehiyon.
