Umubos ha pinakahamubo nga lebel ha sulod han siyam kabulan an porsyento han mga pautang nga dire nababayaran ha mga bangko ha Pilipinas dida han Setyembre.
Ini in mahitungod ha padayon nga paghitaas han kabug-usan nga pautang han mga bangko, bisan man mas hitaas la gihapon an kantidad han mga problemado nga utang kumpara dida han nakalabay nga tuig.
Subay ha pauna nga datos han Bangko Sentral ng Pilipinas (BSP), umubos ha 3.27 porsyento an non-performing loan (NPL) ratio ha sektor han pagba-bangko dida han Setyembre, tikang ha 3.35 porsyento dida han Agosto.
Mas hamubo gihapon ini ha 3.31 porsyento nga nahipatik ha kaparehas nga bulan dida han nakalabay nga tuig. Ini na an pinakahamubo nga lebel tikang hadton Disyembre 2025, han umabot ini ha 3.07 porsyento.
An non-performing loans in natudlok ha mga pautang nga waray kabayari an principal o interes ha sulod han dire maubos ha 90 kaadlaw mahuman an nakatalaan nga petsa han pagbabayad. Ginagamit an NPL ratio agud masukol an kalidad han mga pautang han mga bangko ngan kapas han mga nangungutang nga bayaran an ira mga obligasyon.
Ha kaluyo hini, humitaas la gihapon hin 10.1 porsyento an kabug-usan nga kantidad han mga bad loan ha P593.27 bilyon dida han Setyembre, tikang ha P538.92 bilyon dida han nakalabay nga tuig. Sugadman, mas malaksi nga umursa an kabug-usan nga pautang han mga bangko, nga sumaka ha 11.4 porsyento ha P18.13 trilyon tikang ha P16.28 trilyon. Mahitungod hini, gumuti an parte han mga dire nababayaran nga utang ha kabug-usan nga loan portfolio han industriya.
Sumala kan Rizal Commercial Banking Corporation o RCBC Chief Economist Michael Ricafort, durot han pagdako han kabug-usan nga base han mga pautang an pag-ubos han NPL ratio. Dugang pa hini, mayda pira nga bangko gihapon an nagin mas mahirot ha ira mga aludayday ha pagpapautang.
Bisan man kun komon nga indikasyon han mas maupay nga kalidad han mga propyedad han bangko an hamubo nga NPL ratio, nagpahimatngon hi Ricafort nga posible ini maapektuhan han paghinay han ekonomiya, paghitaas han presyo han mga papliton, ngan hitaas nga interes ha pangungutang. Posible daw huminay an kapas han pira nga borrowers nga bayaran an ira mga utang mahitungod ha nasabi nga kondisyon.
Iginpakita gihapon han iba pa nga datos nga dire pa hul-os nga nawawara an problema ha pagbabyad han mga putang. Sumaka ha 13.9 porsyento ha P771.75 bilyon an past-due loans dida han Setyembre, tikang ha P677.82 bilyon dida han nakalabay nga tuig. Kaparehas ini han 4.26 porsyento nga past-due loan ratio, mas hitaas ha 4.16 porsyento dida han nakalabay nga tuig pero mas hamubo ha 4.33 porsyento dida han Agosto.
Samtang, humitaas gihapon ha tulo kaporsyento an restructed loans ha P342.78 bilyon tikang ha P332.76 bilyon dida han Setyembre 2025. Ini in mga pautang nga ginbag-o an orihinal nga kondisyon o iskedyul han pagbabayad agud matagan hin higayon an mga nangungutang nga maipadayon an pagbabayad.
Padayon gihapon nga nag-aalutaga hin pondo an mga bangko kumo proteksyon kontra ha posible nga pagkalugi ha mga pautang. Sumaka hin 10.3 porsyento ha P557.98 bilyon an ira allowance for credit losses tikang ha P505.77 bilyon dida han nakalabay nga tuig.
Ha panlantaw ni Ricafort, posible pa madugngan an pas-anon han mga nangungutang kun utro nga mahitaas an interest rates. Nagpahimatngon gihapon ini ha posible nga duro nga epekto han Super El Niño, partikular ha sektor han agrikultura, mahitungod nga posible maapektaran han duro han katmara an kapas han mga parag-uma ngan iba pa nga borrowers nga magbayad hin ira mga utang.
Kaupod gihapon ha mga posible nga duro nga maapektaran an mga negosyo nga nakukurian igpasa ha mga mamaralit an dugang nga gastos ha operasyon. Posible manggud gumutiay an ira kita mahitungod ha duro nga kompetisyon ngan paghitaas han presyo han mga panakot ngan iba pa nga gastuson.
Samtang, mas bulnerable gihapon an mga pamilya nga mayda hamubo nga kita mahitungod ha padayon nga pagmahal han mga papliton nga nagpapaubos ha ira kapas nga batunon an pan-adlaw-adlaw nga panginahanglan ngan bayaran an mga utang.
