TACLOBAN CITY – Patay an usa nga babaye mahuman ine nga pagpusilon han gin-aaligar nga ex-boyfriend hine ha may Brgy.43 Quarry District Tacloban City.
Ginkilala an biktima kan Jessica Durana Agrava, 30- anyos, empleyado ngan residente han Brgy 42, Quarry District Tacloban City.
Samtang ginkilala naman an suspek kan PSMS Van Gregory Benitez, 44 -anyos usa nga PNP active member nga naka-assigned ha Tacloban City Police Office, ngan residente naman han Block 9, Lot 9, Torobay Street, Brgy. 109-A V&G Subdivision, Tacloban City.
Sumala kan PCol. Michael Palermo, City Director han Tacloban City Police Office, nga subay ha ira imbestigasyon ha salaysay han witness nga nanay mismo han biktima, nga samtang nagbabaktas an mga ine pauli ha ira panimalay in naka-abat hira nga mayda nagsisinunod ha ira ngan han ira ine lingi-on, nakakilala dayon an biktima ha suspek ngan dumalagan kaupod han iya nanay pero han papanginanuon na han biktima kun ada paba an suspek in lumingi ine ngan dire maaram an biktima nga nakakasunod ha ira an suspek ngan didto nakahigayon an suspek nga dayon pusilon an biktima.
Samtang nakag angkon naman hin 3 nga igo ha magkalain lain nga parte han iya lawas an biktima nga rason han iya dayon nga kamatayon.
Dayon na man nga kumalagiw an suspek, mahuman an natabo nga panmusil.
Narekober naman han SOCO an 3 nga basiyo han bala hiton pusil ha lugar kun diin natabo an insidente.
Hapagkayana, padayon nga ginhahalpat han mga otoridad an nasabi nga suspek.
