ODD NEWS – Usa nga babaye ha China an gumastos hin 13,000 yuan para igparetoke an talukap han iya mga mata pero mahuman an operasyon, nakurian na hiya nga igpiyong an iya mga mata kun nakaturog.
Ha mga nasud ha Asya sugad han China, South Korea ngan Japan, normal na ha mga molopyo nga magparetoke han talukap han ira mga mata agud nga magkaada ini hin linya o eyelid crease.
Para manggud ha ira, nakakadugang ini han kahusay ha iya mga mata pero may mga kaso nga nagkakaada hin komplikasyon an mga tawo nga nagpapailarom ha mao nga operasyon.
Sugad nala han 30 anyos nga babaye, nga gintago ha ngaran nga Li, gumastos hi Li hin 13, 000 yuan para magkaada hin eyelid crease.
Naging malinampuson an syahan nga procedure, pero dire hiya kuntento ha resulta hini tungod ha pagkita niya in dire halata an linya nga ginretoke ha iya talukap.
Mahuman nga magpailarom ha ikaduha nga procedure, nakuntento na hiya ha retoke ha iya pero an problema naman in dire na niya naipipiyong hin maupay an iya mga mata.
Sumala ha eksplinasyon han iya doktor, halipot la an naging kabutangan han duha nga operasyon han mata ni Li, sanglit dire pa nauupay an samad tikang ha syahan nga operasyon asya nga dumikit ini ha samad han ikaduha nga procedure.
Tungod hini, nakakarawat hi Li han 30,000 yuan nga settlement fee ngan ha pagkayana in ginhuhulat pa niya nga maupay an samad han iya mga mata agud nga maisara na niya ini hin hul-os ha kada nakaturog hiya.
