TACLOBAN CITY – Patay an usa nga anay Person Deprived of Liberty (PDL) mahuman nga pamumusilon ini ha Barangay Linao syudad han Ormoc.
An biktima in gin-kilala kan alyas Junjun, 52-anyos ngan residente han Barangay Naungan ha nasabi nga syudad.
Sumala kan PMaj. Angelo Sibunga, Station Commander hiton Ormoc City Police Station 4, an biktima in tipauli na unta ha ira tikang ha Albuera, Leyte sakay han iya Sports Utility Vehicle han tigda la nga ini in parakrakan han waray pa makilal-e nga mga suspek sakay han usa nga motor ngan itom nga SUV.
Dayun naman nga kumalagiw an mga suspek ha lugar han insidente ngan narekober han mga kapulisan an 25 nga mga basyo han bala.
An biktima in na-release ha presohan mahuman nga maaprobahan han korte an iya plea-bargaining agreement para ha kaso han illegal nga droga.
Ha pagkayana in padayon pa naman an ginbubuhat nga imbestigasyon han mga kapulisan kasumpay han nasabi nga insidente.
