TACLOBAN CITY – Nagpapabilin ha ospital an usa nga anay informant han Armed Forces of the Philippines (AFP) mahuman ini nga pagpamumusilon hin tulo nga suspek ha Sitio Cancaligdas Brgy. Campesao, Borongan City, Eastern Samar.
Sumala kan Pol. Lt. Col. Alberto Dulay Garcia, Jr. hepe han Borongan PNP, ginkilala an mao nga biktima nga hi Zacarias Obina, 66 anyos an pangidaron ngan residente han mao nga lugar.
Subay ha inisyal nga imbestigasyon, tigawas ha ira panimalay an mao nga biktima para mag-alog hin tubig han tigda ini nga pagpusilon han tulo nga dire pa nakikilal-an nga mga suspek nga ada ha 14 ngada 18 anyos an pangidaron.
![](https://img.bomboradyo.com/tacloban/2019/05/borongan-1.png)
Mahuman an ginbuhat nga krimen in dayon nga umeskapo an mga suspek ngan gin-agawan hin motor an usa nga sibilyan.
Dugang pa hini nga posible nga dire taga Borongan an mao nga mga suspek mahitungod nga sumala ha mga testigos klaro daw nga dire kabisado han mga ini an lugar samtang hira in naeskapo na.
Dayon naman nga gindara ha ospital an biktima mahuman nga mag-angkon hin mga inig-an hin bala ha lawas.
Usa naman ha ginhihingita nga anggulo ha pagkayana han mga kapulisan an bahin han anay trabaho han biktima kumo informant han AFP.
An pamahayag ni Pol. Lt. Col. Alberto Dulay Garcia, Jr. hepe han Borongan PNP
Ha pagkayana in padayon pa an gindudumara nga hot pursuit operation han mga otoridad agud nga matudlok ngan madakop an mga suspek.