TACLOBAN CITY – Patay an usa nga American National mahuman nga pagbun-on ha mismo lamay han asawa hini ha Poblacion District II, Mac Arthur, Leyte.
Sumala kan PInsp. Teodoro Tan, hepe han Mac Arthur MPS, ginkilala an mao nga American National nga hi Dennis Mark Jones, 70 anyos an pangidaron, ngan residente han Bukidnon Province.
Subay ha inisyal nga imbestigasyon, naatender han lamay han asawa hini nga hi Elem Jones an mao nga biktima ngan samtang nakikipaghimangraw ha pira nga mga bisita nga nakikilamay ha ira in tigda nala nga dumiretso ha kusina ngan kumuha hin kutsilyo an suspek nga hi Richard Hurley, ada ha legal nga pangidaron ngan residente han Poblacion District III, Mac Arthur, Leyte ngan tigda hini nga ginpanbubuno an biktima.
Dayon naman nga gindalagan ha ospital an biktima pero gindeklara naman ini nga dead on arrival han attending physician ha Abuyog Leyte District Hospital.
Nahibaruan nga umangkon la han ginlalamayan an suspek ngan gin-aalegar nga maiha na daw ini nga nagdidinumot han biktima mahitungod nga ginpasagdan daw la hini an asawa hini.
Ha pagkayana in nakapaslak na an suspek ngan naatubang na ha kaangayan nga kaso.
Padayon gihapon an ginbubuhat nga follow-up investigation han mga otoridad bahin han mao nga insidente.
