TACLOBAN CITY – Mapaso nga gintapo han mga Taclobanon an pag-ulpot han Olympian boxer nga hi Aira Villegas ha siyudad dida han nakalabay nga adlaw, Agosto 23 kun diin, sumala hini nga duro an iya kalipay nga damo nga mga Taclobanon an tumapo haiya ha luyo na gihapon hiton mauran nga panahon.
Ginmalatumat ni Villegas nga “na-overwhelm” hiya ha kalipay han ginpakita nga mapaso nga suporta ngan pagtapo dire la han molupyo, pati na gihapon an pag ka-proud ni Tacloban Mayor Alfred Romualdez.
Dida mangud han butnga hiton ginbuhat nga speech ni Villegas nga kaparti han Hero’s Welcome Ceremony, usa an alkalde han Tacloban an nagpakita hin duro nga kalipay ngan ka-proud ha atleta kun diin, nakag-luha gihapon ini.
Ginpaangbit naman ni Villegas nga usa hi Mayor Romualdez nga nagduso ngan sumuporta haiya dida han nagtra-training ini ngan kun mayda mga paisan-isan sanglit, duro an iya kalipay han makag-uli ini hin medalya para ha Pilipinas ngan para ha Tacloban.
Samtang, dugang naman han Olympian nga ha pagkayana in mapahuway laanay ini kadali kaupod an pamilya hini tungod nga maiha na nga waray niya makaupod an iya mga kag-anak.
