TACLOBAN CITY– Ginklaro han Abucay Police Station 2, an kasumpay han nahitabo nga kakuryente han 4 construction worker kun diin usa an patay ha may Brgy. 1&4 B Libertad, Tacloban City.
Sumala kan Abucay Police Station 2, Station Commander, PMAJ. Shenna Layog, an mga ine in nag-aalsa hiton hagdan pakadto ha igbaw han usa nga building, kun diin magtataod unta an mga ine hin sanitary pipe para han downspout ha wall han Integrated Laboratory Division han matabo an insidente,kun diin waray ine hira makapanginano nga masasagi han nasabi nga hagdan an usa nga live wire, nga nakagkawsa han kakuryente han nasabi nga mga construction workers.
Dugang pa ni Layog, subay ha ira imbestigasyon, pag-abot han imbestigador waray an engineer ngan foreman ha nasabi nga area, samtang mayda naman nagpakilala nga usa nga engineer nga daw iya ine mga tawo, kun diin subay ha salaysay han nasabi nga engineer, an 4 nga construction worker in empleyado han usa nga kompaniya.
Pero ha kadugangan nga impormasyon, mahuman nga mahingaranan an nasabi nga kompaniya dayon ine nga gindiwara nga empleyado nira an 4 nga biktima.
Sanglit, utro nira nga ginpakianhan an nasabi nga nagpakilala nga engineer, kun anu gud an kamatuoran, ngan umamin ine nga dire tinuod nga mga empleyado an mga ine han mao nga kompaniya, lugod in iya la an mga ine gin-hired.
Ha pagkayana, babatunon han nasabi nga engineer an tanan nga mga kagarastusan han mga ine kalakip na an burial han namatay nga biktima.
