ENTERTAINMENT–Nagpagawas hin pahayag an legal counsel ni Anne Curtis, an law firm nga Gorriceta, Africa, & Saavedra, agud nga igbatikos an mga “lewd” ngan “objectifying” nga pahayag nga ginbuhat ni Quezon City 4th Disctrict Rep. Jesus “Bong” Suntay ha usa nga congressional committee hearing.
Gintudlok han mga abogado an mga komento kumo dire naangay ngan dire makakrawat.
Ha ira pahayag nga gin-titulo nga “WOMEN DESEVE RESPECT – EVERYWHERE,” gintatagan hin duon han mga abogado an reputasyon ni Anne kumo usa nga propesyunal ngan respetado nga personalidad ha publiko.
Ginmalatumat han legal team nga waray babayi, publiko man o pribado, an dapat ginmamakarawod o ginbaabstos pinaagi hin mga sexual remarks, labi na ha usa nga pormal nga proceeding ha Kongreso.
Ginmalatumat an mga balaod sugad han Safe Spaces Act (RA 11313) ngan Magna Carta of Women (RA 9710) nga nagtutumong nga proteharan an dignidad han kababayin-an kontra ha sexist ngan degrading remarks.
Mababruan nga nagtikang an kontrobersiya nga pahayag han kongresista han Marso 3 ha House Committee on Justice hearing kasumpay han impeachment complaints kontra kan Vice President Sara Duterte, kun diin gingamit ni Suntay hi Anne kumo usa nga sexual example.
Mahuman han insidente, gintanggal an pahayag han magbabalaod tikang ha opisyal nga record ngan umaro hin pasaylo hi Suntay.
Ha bulag nga pahayag, ginpahayag ni Rep. Suntay: “Nag-a-apologize ako sa mga taong nasaktan. That analogy should not have been made… May backlash ‘yan. I deserve the backlash.”
Umaro gihapon hin pasaylo an asawa niya nga hi Sheila Guevara, nga nag-desisyon nga ig-distansya an ira pamilya tikang ha insidente, ngan ginpahayag nga an ngatanan nga babayi in dapat tratohan nga mayada dignidad ngan respeto.
Kahuman hine, nagaatubang yana hi Rep. Suntay ha mga reklamo mahitungod ha posible nga pagtalapas ha Safe Spaces Act, Magna Carta for Women, ngan code of conduct para ha mga public officials, kalakip an mga complainant nga hira Jean Enriquez (WMW-Pilipinas) ngan Joanna Coronacion (SENTRO-Women).
