TACLOBAN CITY – Patay an usa nga abogado ha pamusil han usa nga lalaki samtang nagha-harvest ine hin mais ha iya umahan ha Villaba, Leyte dida han nakalabay nga adlaw.
Ginkikilala an biktima kan Atty. Elmer Mape, 52 anyos an pangidaron, ngan residente han Barangay Poblacion Del Norte, Villaba, Leyte.
Samtang ginkikilala naman an suspek nga hi Botchoy Oliverio nga dayon umiskapo ha mga otoridad ha mao nga panhitabo.
Sumala kan PMaj. Edwin Tolibas, Chief of Police han Villaba Municipal Police Station, nga nahinabo an pamusil banda 4:30 han kulop, ha usa nga umahan ha Sitio Patag, Barangay Calbugos, Villaba Leyte. Kun diin, pumakadto an biktima ha iya umahan para magharvest han iya gintanum nga mais.
Basar ha report, ginda-op han suspek an biktima ngan ginpamumusil ine. Dayon naman tumakas an mao nga suspek.
Narekober han mga otoridad ha crime scene an basiyo hiton bala han caliber .45 pistol ngan usa nga caliber 9mm Glock 17 nga gintatag-iyahan naman han biktima.
Ha pagkayana, padayon an ginbubuhatr nga imbestigasyon han mga otoridad ha mao nga krimen.
