
Babaribaran han nakapreso nga pastor nga hi Apollo Quiboloy an hangyo han gobyerno han United States nga igpa-extradite hiya, mahitungod nga iginduon han kampo hini nga kinahanglan anay mahuman an pagdungog ha mga kaso nga iya ginkakaatubang ha mga korte ha Pilipinas.
Nakatalaan daw nga hangyuon han kampo ni Quiboloy ha Makati Regional Trial Court nga igdelatar anay an petisyon para ha extradition nga iginsalawad han US government pinaagi han Department of Justice (DOJ).
Subay ha abogado ni Quiboloy nga hi Atty. Ferdinand Topacio, ada ha hurisdiksyon na han mga korte ha Pilipinas an ira kliyente. Ginmalatumat gihapon niya nga gagamiton nira an ngatanan han legal nga pitad nga gintutugutan ha ilarom han extradition treaty han Pilipinas ngan United States, Presidential Decree 1069, ngan mga aludayday nga iginpagawas han Korte Suprema dida han nakalabay nga tuig.
Naaatubang hi Quiboloy ha mga kaso nga qualified human trafficking ngan child abuse ha mga korte ha Pasig ngan Quezon City. Presente naman ini nga nakadetine ha Pasig City Jail.
Labot kan Quiboloy, ginpapamiling gihapon han gobyerno han Estados Unidos an iya igkasi akusado nga hira Teresita Dandan ngan Helen Panilag mahitungod ha mga kaso nga international human trafficking, sex trafficking, conspiracy, ngan bulk cash smuggling.
Subay ha DOJ, nagpapabilin nga dire pa nadadakop hira Dandan ngan Panilag.
Mayda 15 kadlaw ni Quiboloy agud igsumite an iya baton ha extradition request han gobyerno han United States, subay kan Topacio.

