BSP temporarily suspends the P1M enhanced due diligence threshold for large cash withdrawals until Jan 2027. Learn how this affects your transactions.
-- Advertisements --

Temporaryo nga ginsuspendi han Bangko Sentral ng Pilipinas (BSP) an P1 milyon nga threshold nga nagmamando ha mga bangko nga magdumara hin kadugangan nga panginano ha dagko nga cash withdrawals.

Panuyo hini nga mapadali an mga lehitimo nga transaksyon ngan mabaton an ginlalauman nga paghitaas han panginahanglan ha salapi yana nga holiday season.

Ha usa nga memorandum, ginmalatumat han BSP nga gin aprubahan han Monetary Board an suspensyon han enhanced due diligence o EDD threshold kutob Enero 31, 2027. Nagtikang ini igpatuman dida han Nobyembre 13, kasunod han pag-apruba dida han Nobyembre 12.

An EDD in natudlok ha mas mahugot nga panginano han mga bangko ngan iba pa nga institusyonal nga pinansyal agud masigurado nga lehitimo an usa nga transaksyon ngan matudlok kun mayda posible nga koneksyon ini ha money laundering.

Sugadman, gin klaro han BSP nga dire nangangaruyag-sidngon an suspensyon nga pwede na balewarayon han mga institusyon nga pinansyal an mga nagpapadayon nga regulasyon kontra ha money laundering, terorismo, ngan pagpopondo ha mga iginbabawal nga aktibidad.

Kinahanglan la gihapon magdumara an mga bangko hin panginano ha ira mga kliyente, labi na kun mayda kaduda-duda nga transaksyon, dire komon nga aktibidad o dako nga pagbabag-o ha ira financial profile. Ginmanduhan gihapon an mga ini nga padayon nga bantayan an mga transaksyon ngan magsumite hin suspicious transaction reports kun kinahanglan.

Sumala ha BSP, kinahanglan magpabilin nga mabinantayon an mga institusyon nga pinansyal samtang ginsisigurado nga dire nade-delatar an mga lehitimo nga transaksyon.

Syahan na nga ginpahitaas han BSP ha P1 milyon, tikang ha P500,000 an EDD threshold ha ilarom han Circular 1230. Ginbuhat ini mahuman kumunsulta ha mga bangko ngan grupo ha industriya, nga nagpahayag nga damo nga lehitimo nga transakyon sugad han pagbabayad han sweldo, pagpapagawas han pautang, ngan pondo para ha mga proyekto an nalahos ha dati nga limitasyon.

Iginpatuman naman an dati nga P500,000 threshold dida han Setyembre 2025 ha ilarom han Circular 1218 kumo kaparte han mga pitad agud mapugngan an money laundering ngan iba pa nga ilegal nga buruhaton-pinansyal.

Gintagan-duon gihapon han BSP nga waray bisan san-o nagin absolute withdrawal limit an nasabi nga threshold. Pwede la gihapon mag-wthdraw hin kantidad nga lahos hini an mga kliyente basta mabaton an kinahanglan nga beripikasyon. Pwede gihapon magtudlok an mga bangko hin mas mahugot nga kalugaringon nga limitasyon subay ha ira risk assessment ngan financial profile han mga kliyente.