Dire nangangaruyag-sidngon nga talwas na ha pagbaton hi Vice President Sara Duterte ha pag-atras han House prosecution panel han tulo ha upat nga impeachment articles kontra ha iya, mahitungod nga pwede la gihapon lanaton ha magkabulag nga legal nga proseso an mga alegasyon nga nakasulod hini.
Ini an iginduon ni Akbayan party-list Rep. Perci Cendaña, nga nagpahayag nga estratehiya han prosekusyon an pag-atras han tulo nga artikulo agud mapalaksi an resolusyon ha impeachment case kontra ha bise presidente.
Ha usa nga interbyu, ginmalatumat ni Cendaña nga importante nga dire humalaba an pagdungog mahitungod nga posible makatagamtam hini an respondent ngan hinay-hinay nga huminay an interes han publiko ha kaso.
Kaupod ha mga igin atras nga artikulo an Article I nga naghihingaday ha sayop nga pag-gamit han confidential funds, Article III kasumpay ha bribery, ngan Article IV kasumpay naman ha grave threats.
Sugadman, ginpahayag ni Cendaña nga pwede la gihapon magpasaka hin bulag nga kaso kontra kan Duterte, ha Office of the Vice President (OVP), ngan ha panahon nga nagmamangulo pa ini kumo sekretarya han Department of Education (DepEd) kasumpay han paggamit han confidential ngan intelligence funds, subay ha nagpapadayon nga balaod ngan proseso.
Iginpunto gihapon niya an pinal nga disallowance han Commission on Audit (COA) ha P73.287 milyon nga confidential expenses han OVP kumo posible nga basarananhan kadugangan nga aksyonhan Office of the Ombudsman.
Sumala kan Cendaña, importante nga magamit an mga legal nga mekanismo agud masigurado an pagbaton ha paggamit han pondo han nasud.
Ginsusuportahan gihapon niya an panawagan nga tanggalon an pagigin classified han confidential funds nga igin alutaga kan Duterte agud mapanginano han publiko ngan han mga otoridad kun patiunan-o ginamit an mga ini.
Ha kaluyo han pag-atras ha tulo nga artikulo, nagpapabilin nga nakabinbin ha impeachment trial an Article II nga naghihingaday ha dire mai-eksplikar nga karikuhan han bise presidente. Gin karawat naman han Senate Impeachment Court an pag-atras han prosekusyon dida han Oktubre 13.
Nakatalaan nga magpadayonan pagdungog ha Nobyembre 9, kun san-o ginlalauman nga ig aatubang han defense team ni Duterte an ira parte.
