TACLOBAN CITY — Ginpapauswag han Leyte Metropolitan Water District (LMWD) an sistema han suplay han tubig ha Baruguhay ngan Pastrana, samtang ginlalauman nga matatagan hin tubig an mga apektado nga komunidad ha masunod nga mga bulan.
Sumala kan Ronnie Cornico, general manager han LMWD, nag-ubos an lebel han tubig ha Baruguhay, kun diin tikang ha duha ka milyon ka litro kada adlaw, nagin usa na la ka milyon ka litro an nakakaya nga mahatag nga suplay. Ginpahayag niya nga usa han mga hinungdan hini amo an drought o maiha nga panahon nga kulang an uran, pati gihapon an mga konstruksyon nga ginbubuhat han Department of Public Works and Highways (DPWH).
Ginklaro ni Cornico nga waray naman problema ha suplay han tubig ha Pastrana kun diin personal hiya nga kumadto ha lugar agud usisahon an sitwasyon. Mayda liwat mga bato ngan baras nga nakakaulang ha agianan han tubig, samtang gindidiri an pagpasulod han mga kagamitan tungod han mga pangandaman para ha interconnection han Filter-C. Ginlalauman nga ha sunod nga semana makakapasulod na hin mga kagamitan agud matanggal an mga bara.
Dugang pa ni Cornico, dako na an pagbag-o ha proyekto han tubig tungod han ₱800 milyon nga pondo nga iginhatag ni Lucio Co, nga makakabulig ha pagpadayon han Filter-C. Ginpaangbit liwat niya nga nakakaapekto ha sistema han suplay han tubig an mga konstruksyon han DPWH ha drainage, an pagbutang hin mga poste han LEYECO, ngan an mga balay ngan lote nga nakakaulang ha pagpaawas han tubig.
Samtang, ginpatapod ni Cornico nga nagpapadayon an mga pangandaman ha pagpauswag han sistema han suplay hin tubig, upod an pag-energize han linya ginlalauman nga mahihimo ha Disyembre. Dugang pa niya nga padayon an pag-ayad han mga pasilidad agud masiguro an mas maupay nga pag-agos han tubig ha mga panimalay.
