TACLOBAN CITY – Walo katawo an nahipatik nga patay samtang 13 naman an samaran ha nahitabo nga bungguay hin usa nga pampasaheros nga van ngan 6 wheeler truck ha National Highway han Sitio Tab-ang, Brgy. District III, Babatngon, Leyte.
Sumala kan Pol. Lt. Melvin Ay-ay, OIC han Babatngon MPS, biyahe tikadi ha syudad han Tacloban an mao nga utility van nga ginmamanehuan ni Rodel Ecat, nga may 18 nga pasaheros han makabungguay hini an mao nga truck nga may sakay liwat nga mga baboy nga hayop.
Subay ha inisyal nga imbestigasyon, parehos madagmit an padalagan han duha nga sarakyan rason han pagbungguay han mga ini ha pakurbada nga parte han karsada
An pamahayag ni Pol. Lt. Melvin Ay-ay, OIC han Babatngon MPS
Ginkilala an mga biktima nga dead on the spot nga hira Nene Ochela, Emma Elorde, Manilyn Aringan, Alvin Camuin, Remilyn Camuin, Jackson Casanigo, Eliyong Piscos ngan usa nga biktiman nga nagngangaran nga hi Leila, puros mga residente han Talalora, Samar.
Dayon naman nga gindara ha ospital an 13 nga samara nga biktima kaupod an driver han mao nga van ngan truck.
Ha pagkayana in padayon pa an gindudumara nga imbestigasyon han mga otoridad bahin ha mao nga insidente.
