TACLOBAN CITY – Ginkilala nga overall champion an Pilipinas han katatapos la nga 2024 ICF Dragon Boat World Championships, nga ginbuhat ha Puerto Princesa, Palawan tikang han Oktubre 31 ngada han Nobyembre 4.
Kaupod han Philippine Canoe Kayak Dragon Boat National Team an 7 nga delegates nga tikang ha Eastern Visayas nga ginkakadabihan nira Jobert Penaranda, Kimly Balboa, Ivan Ercilla, ngan Janus Ercilla tikang ha San Miguel Leyte, ngan Jimmylyn Ligutan, Sherylou Vermug ngan hi Michelle Calzada nga tikang naman han Tacloban City.
Nakab-ot han Philippine Canoe Kayak Dragon Boat National Team an 39 nga medalya, kaupod an 11 nga gold, 20 nga silver, ngan 8 nga bronze medal ha magkadurudilain nga kategorya han 2024 ICF Dragon Boat World Championships.
Samtang nakuha naman han Thailand an ikaduha nga pwesto kun diin may-ada hira 8 golds, ngan ginsundan naman ini han Individual Neutral Athletes o AIN nga may-ada six golds, three silvers, ngan three bronzes.
Aada ma man ha 2 thousand nga mga delegado an kabulig hini tikang han 27 nga magkaduru-dilain nga nasud sugad nala hiton Ukraine, Canada, Hungary, Cambodia, Korea, India, Islamic Republic of Iran, Hong Kong, Germany, China, Chinese Taipei, Czech Republic, Indonesia, Macau, Malaysia, Sweden, ngan Spain.
Samtang nagpaangbit naman an usa nga delegado han Team Philippines tikang ha San Miguel Leyte nga hi Jobert Penaranda han iya kalipay han ira naangkon nga kadaugan in labi na nga ini an siyahan nga higayon nga an Pilipinas an nag-host hini nga event. (via Bombo Shiela Encio)
