NATIONAL – Nakakarawat na han Pilipinas an 500,000 doses han pentavalent vaccines kontra ha 5 sakit kaupod na an pertussis o whooping cough.
Sumala ha Department of Health, umulpot an nasabi nga bakuna ha nasud yana nga Agosto ngan presente aada an mga ini ha cold storage samtang ginsasapinal pa an mga dokumento agud tugutan an distribusyon hini ha health center han gobyerno ha bug-os nga nasud.
Waray naman ginmalatumat han DOH kun diin tikang an mga nasabi nga bakuna pero ginanunsiyo hini an kadugangan pa nga 750,000 doses han pentavalent vaccine ngan ginlalauman nga maulpot ha masunod nga semana.
Sumala kan Health Sec. Ted Herbosa, gintitikangan na han ginkontrata nga supplier han PH an pagdudul-ong han pentavalent vaccines nga maproteher ha mga bata nga Pilipino nga aada ha 6-ka semana pala iton edad.
Samtang, basar naman ha report tikang ha DOH, humamubo na an nahipatik nga kaso han pertussis tikang dida han Hulyo nga aada ha 50 cases per week, humamubo ini tikang ha 300 cases per week dida han Abril.
