TACLOBAN CITY – Maabot 500 nga mga housing units ha Tacloban North resettlement sites an posible bawion han City Housing tikang ha mga benepisaryo hini tungod nga diri ini gin uukyan.
Sumala kan Ted Jopson, OIC han Tacloban City Housing and Community Development Office nga nag issue na hira hin notice of Violation ha mga benepisaryo dida han nakalabay nga Enero tungod nga ira nahisabtan nga diri ngaean napapahimuluson an mga pabalay nga ginhatag han gobyerno.
Dugang pa ni Jopson nga ginlalauman unta nira nga madamo an okupante han mga housing units ha Norte nga parte han Tacloban mahuman an ira ginbuhat nga demolition han Setyembre han nakalabay nga tuig ha mga balay nga aada ha danger zones.
Pero ha luyo hini in waray ngaean bumal-in an pira nga benepisaryo lugod abandonado pa an pira mga mga housing units.
“Napapausa kami based ha amon monitoring, waray nangungukoy han mga pabalay. Dida pa ini han 2017 gin-award haira. Kon susundon an occupancy rule, one month la nga waray naukoy considered na as abandoned”, an pahayag ni Jopson ha usa nga interview.
Gintatagan naman hin tsansa an mga benepisaryo nga makag-esplikar ha Local Inter-Agency Council pinaagi hin “written explanation” ngan kon pakyas hira mga mabuhat ini in babawion ha ira an housing unit ngan ighahatag liwat ha ginatos gatos pa nga taga Tacloban nga waray pa mga pabalay.
Mababaruan nga ha 11, 136 nga mga pabalay ngan ginraffle ngan gin award han NHA ha mga benepisaryo pero 7,030 pala han mga ini an mayda permanente nga okupante.
